Top Tien Bonsmara Inligtingsdag en Veiling Verslag 2014
Monday, July 21, 2014

Top Tien het weer ‘n top aanbod.

Die vyfde jaarlikse Top Tien Bonsmara Inligtingsdag en Veiling is op 17 en 18 Julie by Agra se veilingskrale op Otjiwarongo aangebied. Altesaam 36 uitgesoekte Bonsmarabulle en sowat 100 stoet- en kommersiële vroulike diere is aangebied. Die duurste bul van die dag, geteel deur Okamaja Bonsmaras van mnr Jörg Sigwart, het vir N$60 000 onder die hamer gekom. Die koper was mnr Henk Meyer van die Khomas Hochland, self ‘n Bonsmara teler. Die res van die bulle is vir ‘n gemiddeld van N$32 848 verkoop is.

Altesaam 112 verse is vir ‘n gemiddeld van N$6 546 verkoop en een koei en kalf is vir N$10 000 van die hand gesit. Altesaam 50 kopers het vir die veiling geregistreer en ‘n totale omset van N$1 925 729 is behaal.

Die Top Tien telers het hul tevredenheid met vanjaar se geleentheid uitgespreek. “Ten spyte van die moeilike omstandighede wat tans in die Namibiese vleisbeesbedryf heers wat die uitvoere na Suid- Afrika betref, is ons baie tevrede en baie dankbaar vir die pryse wat behaal is,” het Ben Mouton, die hooforganiseerder, gesê.

Kiep Lepen van Agra stoetveedienste, wat ook die seleksie van diere vir die veiling behartig, sowel as die “kyk-weer” beamptes van die genootskap was dit eens dat dit die sterkste aanbod op die Top Tien nòg was, en dat dit ook in die pryse weerspieël het.

Die boeredag wat jaarliks voor die veiling gehou word, het weer vir baie interessante praatjies en praktiese inligting gesorg. Selfs die boere is hierdie keer ‘n geleentheid gegee om hulle ondervindinge te deel. Wilhelm Mosehuus en Arné Gressmann het vertel hoe hulle die vorige jaar se uitdagende omstandighede moes hanteer, of dit nou droogte of vloede was. Dr Joggie Briedenhann het met behulp van die gebruikersvriendelike veilingkatalogus aan voornemende kopers die magdom syfers en inligting wat die Bonsmaras beskikbaar het, maklik uiteengesit. Streicher Coetzee het met die toepassing van pelvismetings in sy eie kudde baie vinnige vordering gemaak, en het hierdie ondervinding met die gehoor gedeel. Die praktiese gedeelte, waartydens deelnemers self op bekken-bene metings kon “oefen”, en ook die kastrasie van groot tollies kon sien, het groot byval gevind. Riaan Momberg van Efekto het oor tuinbou gesels.

Die dag is afgesluit met ‘n spesiale wynproe-dinee. Die voormalige Springbok rugby speler, Schalk Burger snr, van die familie se Welbedacht wynlandgoed by Wellington, het spesiaal vir daardie geleentheid wyne saamgebring, wat saam met ‘n drie-gang maaltyd aangebied is om te proe. Tydens die geleentheid is daar ook ‘n veiling gehou van versamelaarswyne. Altesaam N$28 000 is ingesamel ter ondersteuning van Belinda Vermeulen, ‘n inwoner van Otjiwarongo wat weens ‘n motorongeluk in ‘n rolstoel gelaat is. “Dit is vir ons belangrik om aan die gemeenskap, wat ons elke jaar ondersteun, erkenning te gee en as teken hiervan weer ons bydrae terug te ploeg in die gemeenskap,” sê Ben Mouton, wat al die harde werk agter die skerms met die Top Tien se reëlings hanteer het.

Die Top Tien veilingsgroep sluit in Jörg Sigwart van Okamaja Bonsmaras, Erni en Regina de Fries van Ondoka Bonsmaras, Edward Hansen van Emok Bonsmaras, Dries Venter van Tzaus Bonsmaras, Ben en Corlia Mouton van Wagner Bonsmaras, Streicher en Hella Coetzee van Hochfeldstreek Bonsmaras, Jörg von Dewitz van Stokkies Bonsmaras en Volker Kreft van Omuronga Bonsmaras.

Recent News

Bonsmara Namibia Fees Dinee
Published in Agriforum
Monday, 14 November 2016

This year the Bonsmara Cattle Breeders Association is 40 years old. This article published in the Agriforum looks at our past and the present of the Associaton. To keep updated with the future, check our website regularly!

Gobabis Farmer's day
Thursday, 18 August 2016

The guestspeakers from left to right: Fouchè Brand (Capricorn Asset Management) talked about the impact the economy has on the Namibian Farmer, Phillip Oosthuizen (Sernick Bonsmaras) spoke about the precision that goes into rounding off feedlot cattle. Dr Joggie Briedenhann (Hartebeestloop) spoke about weaner weight and how it influences your returns.

 

Published in Agriforum
Thursday, 11 August 2016

Die pas afgelope jaarlikse Bonsmara raspromosie dag is met groot sukses deur die Bonsmara Telers Genootskap van Namibië op 11 Augustus 2016 by die Agra ring in die hoofstad aangebied.